Bangkok, Tailandia – Iha loron-12 fulan-Fevereiru 2025, Sra. Kerry Galhós, nu’udar Clean Sport Educator ba International Testing Agency (ITA) no Jestora Programa Anti-Doping Timor-Leste, hetan onra hodi sai oradora no fasilitadora iha semináriu internasionál anti-doping. Semináriu ne’e organiza husi Ju Jitsu Asian Union (JJAU) nu’udar parte husi 2nd Ju Jitsu Asian Youth Championship 2025, ne’ebe partisipa husi JJAU nia funsionáriu sira, treinador/a Ju Jitsu, jestór sira, ofisiál sira no atleta sira husi Azia.
Durante semináriu ne’e, Sra. Kerry hala’o sesaun kona-ba anti-doping, ne’ebé kobre tópiku prinsipál sira hanesan Direitu no Responsabilidade Atletu, Regra Anti-Doping, Prosesu Kontrolu Doping, no Izensaun Uzu Terapéutiku (TUE). Sesaun ne’e ninia objetivu mak atu hasa’e partisipante sira-nia komprensaun kona-ba prinsípiu desportu ne’ebé moos no sira-nia papél atu mantein integridade iha desportu.
Refleta kona-ba ninia esperiénsia, Sr. Kerry hatete: “Ida-ne’e oportunidade dahuluk hodi aprezenta iha semináriu internasionál anti-doping, no ne’e mak esperiénsia ida-ne’ebé gratifikante tebes. Envolvimentu ho atleta no ofisiál sira husi Azia tomak hametin importánsia edukasaun nian hodi promove kultura desportu moos. Ha’u agradese tebes ba oportunidade hodi kontribui ba inisiativa ida-ne’e no hein atu kontinua servisu ne’e.”
Nia mós hato’o ninia agradesimentu ba organizasaun sira ne’ebé halo ida-ne’e posível, hodi dehan: “Hau agradese tebes ba Ju Jitsu Asian Union (JJAU) ba oportunidade atu hola parte iha eventu importante ida-ne’e, SEARADO ba sira-nia apoiu tomak, no International Testing Agency (ITA) ba sira-nia orientasaun no konfiansa ba ha’u-nia kna’ar nu’udar Clean Sport Educator. Ha’u mós hato’o ha’u-nia apresiasaun ba Ministeriu Juventude, Desportu, Arte no Kultura (MJDAC) ba apoiu ne’ebé boot tebes hodi avansa edukasaun anti-doping no inisiativa desportu moos.”
Inisiativa ida-ne’e aliña ho esforsu globál atu eduka atleta sira no fó apoiu ba pesoál apoiu atleta sira kona-ba regras anti-doping, reforsa importánsia husi integridade, justisa, no kumprimentu iha desportu.
Haree ba oin, Sr. Kerry nafatin iha kompromisu atu hametin edukasaun anti-doping iha Timor-Leste no kolabora ho parseiru internasionál sira atu promove desportu ne’ebé moos iha rejiaun ne’e.